Antananarivo, 11 Jona 2026
Hentitra ny Minisiteran’ny Varotra sy ny Fanjifana manoloana ny gaboraraka misy amin’ny fitahirizana sakafo saro-pady eto an-drenivohitra. Noho ny tsy fahafenoan’ny fepetra ara-pahasalamana sy ny tsinontsinona ny fitahirizana amin’ny hatsiaka na ny « chaîne de froid », dia noraisina ny fepetra hentitra nampidiana takonana vonjimaika ny faritry ny sakafo fampangatsiahana tetsy amin’ny toeram-pivarotana lehibe iray teto Antananarivo, miaraka amin’ny fanagiazana entana lany daty tany amin’ny toerana hafa. Ity hetsika faobe ity, izay baikoan’ny Minisitry ny Varotra sy ny Fanjifana Haingotiana ANDRIAMADISON, dia efa miparitaka manerana ny Nosy amin’izao fotoana izao amin’ny alalan’ireo mpitsirihana sy ny Fitaleavam-paritra.
Sakafo saro-pady no voasazy sy natao dindo famantarana
Nodorana marika manokana tsy ahafahana mikitika azy intsony ireo entana rehetra tao anatin’ny faritra nandraisana izao fepetra fanakatonana vonjimaika izao. Voakasik’izany gaboraraka izany mivantana ny toerana misy ny hena voahodina isan-karazany toy ny charcuterie, ny fromazy samihafa, ny fivarotan-kena ary ireo sakafo masaka efa vonona hohanina avy hatrany. Ireo karazan-tsakafo ireo mantsy dia misy fahatsorana haingana amin’ny fahasimbana raha vao tsy dindo tsara ny hatsiaka miaro azy.
Araka ny fanazavan’ny Tale jeneralin’ny Varotra anatiny sy ny Fanjifana (DGCIC), Gilchrist RAKOTOSON, teny am-panatanterahana ny fitsirihana, dia misy ny tsy fahatomombanana lehibe eo amin’ny maripana tsikaritra. Raha tokony ho tazonina 3°C ny fampangatsiahana rehefa tonga eo amin’ny toerana fivarotana na fampirantiana anefe ny entana dia misy hatramin’ny 8°C. Manana fiantraikany mivantana amin’ny fahasalaman’ny olona izany satria miovaova ny maripàna, ary mety mbola hiova hafa indray rehefa tonga any amin’ny mpihinana azy.
Laboratoara sy fanaraha-maso hentitra hitohy manerana ny tanàna
Tsy nijanona tamin’ny fanakatonana fotsiny ny hetsika fa nisy koa ny fandraisana singa tamin’ireo hena sy fromazy nampiahiahy teny amin’ny toeram-pivarotana lehibe iray hafa mba hoentina hotsapaina any amin’ny laboratoaran’ny ACSQDA eo anivon’ny Minisiteran’ny Fahasalamam-bahoaka.
Tao anatin’ny iray andro monja dia niparitaka tamin’ireo toeram-pivarotana lehibe rehetra teny Ankorondrano, Tanjombato, Digy, Analakely sy ny manodidina ireo kaomisera sy mpanaramaso ny varotra sy ny fifaninanana. Nanamafy ny Tale jeneraly fa hitohy sy hihamafy hatrany izao fanarahan-maso ny kalitaon’ny entana amidy eny amin’ny tsena izao mba hiarovana tanteraka ny vahoaka mpanjifa.
Laisser un commentaire