Ny 11 jona izao, hiantomboka ao Mexico ny fiadiana ny tompondaka erantany 2026. Hetsika izay tsy hoe manetsika ny mpankafy baolina kitra ihany, fa lasa ivon’ny fifanakalozana ara-toekarena sy ara-politika goavana indrindra eto amin’izao tontolo izao.
Antananarivo – 10 jiona 2026
Miavaka ity fanontana ity satria ekipa 48 no handray anjara, izay ahitana lalao 104 tsy mbola nisy toy izany teo amin’ny tantara. Ho an’i Mexico, izay efa nampiantrano tamin’ny taona 1970 sy 1986, dia fotoana iray lehibe indray izao hanamafisana ny lazany eo amin’ny sehatra iraisam-pirenena. Tombanana ho 3 miliara dolara ny tombontsoa ara-toekarena mivantana ho an’ny firenena Meksikana.
Eo amin’ny lafiny ara-toekarena iraisam-pirenena, dia heverina fa hitondra fitomboana hatrany amin’ny 40,9 miliara dolara eo amin’ny vokatra ara-toekarena (PIB) maneran-tany ity hetsika ity. Ny varotra zo handefa ny lalao (droits TV) sy ny fanohanan’ny orinasa vaventy (sponsoring) dia hahatratra isa tsy mbola nisy toy izany, manamafy ny toerana misy ny baolina kitra ho indostria ara-panatanjahantena matanjaka indrindra.
Ankoatra izany, ny Mondial 2026 dia fitaovana lehibe ho an’ny « soft power » na ny hery malefaka eo amin’ny tontolon’ny politika. Amin’ny alalan’ny fiaraha-miasa eo amin’ny Etazonia, Kanada, ary Mexico, dia aseho amin’izao tontolo izao ny tanjaky ny fifandraisana ara-diplomatika ao Amerika Avaratra. Ny kianja dia lasa toerana isehoan’ny fifaneraserana eo amin’ny firenena samihafa, izay mampiseho fa mihoatra lavitra ny lalao 90 minitra ny lanjany.
Raha fintinina, ny fiadiana ny tompondaka erantany 2026 dia fitaratra maneho ny tontolontsika ankehitriny, izay ahitana ny fifangaroan’ny hafanam-po ara-panatanjahantena sy ny zava-misy ara-politika sy ara-bola sarotra.
Laisser un commentaire