Nolanian’ny filankevitry ny minisitra ny 10 jona 2026 ny fanomezana tambin-karama ho an’ny trano fonenana ho an’ireo mpiasam-panjakana. Ity fepetra ara-tsosialy ity, izay vokatry ny fiaraha-miasan’ny ministeran’ny Asa sy ny ministeran’ny Vola, dia mikendry ny hanatsarana ny fari-piainan’ireo mpiasa eny anivon’ny sampandraharaha isan-tsokajiny manerana ny Nosy.
Antananarivo, 10 juin 2026
Nolaniana nandritra ny filankevitry ny minisitra natao tamin’ity 10 jona 2026 ity, teny amin’ny lapa-panjakana eny Iavoloha, ny fanapahana fanomezana tambin-karama ho an’ny trano fonenana. Dingana lehibe iray eo amin’ny lafiny sosialy izany, natao hanatsarana ny fari-piainan’ireo mpiasam-panjakana sy hanamafisana ny fahefa-mividin’izy ireo.
Ireo mpiasam-panjakana eny ifotony, ireo miparitaka eny amin’ny vondrombahoakam-paritra itsinjaram-pahefana, ary ireo izay miasa eny amin’ny antokon-draharaham-panjakana no hisitraka voalohany izany tombontsoa izany. Tanjona amin’izao fanapahan-kevitra izao ny hanome lanja ny asa sahanin’ireo mpiasa eny anivon’ny faritra, indrindra fa ireo lavitra ny renivohitra.
Ny Minisiteran’ny Asa, ny Fampananana Asa, sy ny Asam-Panjakana no nikarakara ny didim-panjakana mikasika izany, niarahana niasa akaiky tamin’ny Minisiteran’ny Toekarena sy ny Fitantanam-bola. Izany fiaraha-miasa izany dia porofon’ny finiavan’ny fitondram-panjakana handamina maharitra ny famatsiam-bola ilaina amin’izao fanampiana izao, sady miantoka ny fahamarinan-toeran’ny tetibola.
Ankoatra ny fanatsarana ny fiainan’ny mpiasa, dia mikendry ny hampitombo ny faharisihan’ny olona hiasa ao amin’ny sehatry ny asam-panjakana ihany koa ny fanjakana amin’ny alalan’ity fepetra ity. Ny antsipiriany mikasika ny fomba fampiharana sy ny fotoana hanombohan’izany dia hivoaka amin’ny alalan’ny taratasy boribory avy amin’ny minisitera tsy ho ela.
Laisser un commentaire