Manoloana ireo tranga mampivarahontsana sy ny fahaverezan-jaza tato ho ato, nivoaka tamin’ny fahanginany ny fitondram-panjakana. Nandritra ny valan-dresaka ho an’ny mpanao gazety niarahana tamin’ireo minisitra miandraikitra ny filaminana androany Alahady teny Anosy, dia nambara mazava fa misy tetika fanakorontanana niniana nolamina ao ambadik’izao tsy fandriampahalemana izao. Efa misy ireo olona voasambotra sy nampidirina am-ponja ankehitriny.
Antananarivo – 5 jolay 2026
Tetika fanakorontanana efa nisy hatramin’ny ela
Nifarana tamin’ny feo tokana ny Minisitry ny Atitany, ny Filaminam-bahoaka, ny Mponina, ary ny Minisitra delege misahana ny zandarimariam-pirenena raha nifanatrika tamin’ny mpanao gazety. Araka ny fanazavana nentin’izy ireo, dia efa hatramin’ny nijoroan’ny fitondrana Fanavaozana no nahitana tranga hafahafa mikendry ny hanakorontanana ny firenena. Tafiditra ao anatin’izany ny fikasana hamono ny Filohan’ny Repoblika, ny fanafihan-jiolahy mitam-piadiana, ny herisetra sy famonoana zaza varira, ary izao hala-jaza lany tamingana izao.
Nabamafisin’ireo mpitondra fa tsy hijanona fotsiny amin’ny fijerena ny fanjakana fa efa nanao dingana lehibe. Nisy sahady ireo olona voarohirohy no voasambotra sy efa naiditra am-ponja vonjimaika. Mbola mitohy kosa ny fanadihadiana lalina sy ny fikarohana mba hamongorana tanteraka ireo atidoha mpikotrika sy ny tompon’antoka rehetra, indrindra fa amin’ity raharaha fakana an-keriny sy hala-jaza mampihorohoro ny vahoaka ity.
Fiarovana ny mpianatra hiatrika ny BEPC sy ny BEP rahampitso
Mba hamerenana ny fitoniana ao anatin’ny fianakaviana sy hiantohana ny fisaorana an-tsakany sy an-davany ny fanadinana mpanjakana BEPC sy BEP izay manomboka rahampitso, dia handray andraikitra hentitra ny mpitandro filaminana. Nanome toky ny Ministeran’ny Ati-tany sy ireo rafitra mpiaro ny filaminana fa haparitaka ny hery rehetra mba hiarovana ny zaza malagasy mandritra ny fotoam-panadinana. Ho hentitra ny fanaraha-maso ny manodidina ny sekoly rehetra mba hahafahan’ny mpanadina miatrika izany am-pitoerana.
Laisser un commentaire