Taorian’ny fitokonan’ireo mpitondra fitaterana izay nampijaly ny mponina ny talata 23 jona lasa teo, nesorina tamin’ny toerany Andriamatoa Estel Albert Ainanirina, Tale jeneralin’ny polisy sady Tale teo aloha teo anivon’ny Fitaleavan’ny Fitaterana sy ny Likidana an-Tanàn-dehibe (DTMU). Ny alakamisy 25 jona 2026 no tontosaina ny fifamindram-pitantanana ofisialy, nampandraisana andraikitra an’Andriamatoa Panoel Tsiky Rakotondrainivonona ho Tale vonjimaika. Manoloana ny fanamafisan’ny Kaominina ny fampiharana ny sazy, mby ao an-tsaina ny fanontanian’ny maro : hampiova zavatra amin’ny fimenomenon’ny Taxibe momba ireo sazy ara-bola mihatra amin’ny fampidirana fiara pound ve izao fialan’ny Tale teo aloha izao ?
Antananarivo – 27 jona 2026
Fifamindram-pitantanana teo anivon’ny DTMU
Tanterahina ny 25 jona 2026 ny fifamindram-pitantanana teo amin’Andriamatoa AINANIRINA Albert Estel, Tale teo aloha, sy Andriamatoa RAKOTONDRAINIVONONA Panoel Tsiky, Chef de Corps de la Police Municipale, izay voatendry ho Tale vonjimaika eo anivon’ny DTMU. Natrehin’ny Filoha Lefitry ny PDS voalohany sy faharoa, ny Sekretera Jeneralin’ny Tanàna ary ireo mpiara-miasa isan-tsokajiny ny fotoana.
Nisaotra ireo rehetra niara-niasa taminy sy nametraka fitokisana azy ny Tale teo aloha, ary nirary fahombiazana ho an’ny Tale vaovao. Etsy ankilany, nanentana ny mpiasa ny Tale vaovao mba hanohy ny asa amim-pahavitrihana sy amim-pitandremana, noho ny maha-sehatra mivantana mifandray amin’ny fiainan’ny mponina ny DTMU.
Fanalana amin’ny toerana taorian’ny fitokonan’ny mpitatitra
Na dia teo aza ny fombafomba fanao amin’ny fifamindram-pitantanana, tsy azo afenina fa nisy antony lehibe niteraka izao fanovana izao. Nesorina tamin’ny toerany tokoa mpanampy jeneralin’ny polisy Estel Albert Ainanirina, vokatry ny fitokonan’ireo mpitatitra ny talata 23 jona teo. Io hetsika io dia naneho ny tsy fifanarahana eo amin’ny mpitantana sy ireo mpisehatra amin’ny fitaterana eto an-drenivohitra.
Ny lohahevitra fototra tsy mampitovy hevitra hatramin’izao dia ny fitarainan’ireo mpamily sy tompon’ny Taxibe momba ireo sazy ara-bola mihatra amin’ny fampidirana fiara any amin’ny pound, izay heverin’izy ireo fa misy endrika fanararaotana sy manindry sady mampitambotsitra ny fidiram-bolan’izy ireo.
Tale vaovao, saingy mbola hitohy ny pôlitikan’ny Kaominina
Na niova aza ny mpitantana, ny fomba fiasan’ny Kaominina kosa dia mbola hentitra tanteraka. Nanamafy ny Filoha Lefitry ny PDS fa hitohy ny fampiharana ny politikan’ny Kaominina amin’ny fampanajana ny lalànan’ny fifamoivoizana ary ny fanasaziana ireo fandikan-dalàna, ho fanatsarana hatrany ny fitantanana ny tanàna.
Manoloana izany fanamafisana izany, hampiova zavatra tokoa ve ny fialan’Andriamatoa Estel Albert Ainanirina amin’ny fitarainan’ny Taxibe ? Tsy misy afaka maminany izany mialoha. Marina fa hitondra fomba fiasa vaovao sy hery vaovao eo amin’ny fitantanana ny mpiasa eny an-kianja Andriamatoa Panoel Tsiky Rakotondrainivonona, noho izy avy ao amin’ny Police Municipale.
Saingy, raha mbola tsy miova kosa ny fototry ny olana, indrindra ny tahan’ny sazy ara-bola sy ny fepetra fampidirana pound, dia mety mbola hisy foana ny feo fieritreretana eo amin’ny roa tonta. Andrasana amin’ny Tale vonjimaika vaovao ny fahaiza-mandanjalanja eo amin’ny fanarahana ny toromariky ny Kaominina sy ny fitadiavana marimaritra iraisana mba hisorohana ny fitokonana mety hampijaly ny vahoaka indray.
Laisser un commentaire