Tsy mitazam-potsiny manoloana ny olan’ny fahatapahan-jiro lavareny izay mianjady amin’ny tanànan’i Antsiranana ny orinasa JIRAMA. Mba hamonjena ny tsy fahampian’ny vokatra herinaratra any an-toerana, dia nisy ny fitaovana stratejika miavaka namela an’Antananarivo ny alakamisy 24 jona hariva teo hizotra mankany amin’ny tapany avaratry ny nosy. Ity fidinan’ny fitaovana ity dia natao hanamafisana ny tambajotra sy handrindrana ny fampiasana ireo milina mpihary herinaratra vaovao efa an-dalam-pametrahana.
Antananarivo – 25 jona 2026
Teo amin’ny foibe Analamahitsy eto Antananarivo no niala ireo fiarabe nitondra vata mpanova herinaratra (transformateurs) miisa telo, izay manana tanjaka 630 kVA avy. Ireto vata ireto dia hifanome tanana amin’ireo fitaovana efa any an-toerana ary tena ilaina tokoa amin’ny fampandehanana ireo milina mpihary herinaratra vaovao, izay efa nalefa any Antsiranana andro vitsivitsy lasa izay.
Eny an-toerana, efa eo am-panatanterahana ny asa rehetra amin’ny fametrahana sy ny fampitohy ireto milina ireto ny ekipa teknika ankehitriny. Vinavinain’ireo mpahay teknika hisahana ny andrana voalohany amin’ny fampandehanana ny iray amin’ireo milina ireo, izay manana tanjaka 800 kW.
Manoloana ny fahasahiranana lehibe ateraky ny fahatapahan-jiro miverimberina, ny mpitantana ny orinasa dia naneho ny fankasitrahana feno manoloana ny faharetana sy ny fandeferana asehon’ireo mpanjifa ao Antsiranana, mandra-pahatongan’ny fiverenana tsikelikely amin’ny laoniny ny famatsiana.
Laisser un commentaire