Efa nanomboka tamin’ny fomba ofisialy ny asany ao Addis-Abeba ny Masoivoho vaovaon’i Madagasikara any Éthiopie, S.E.M. Auguste Paraina, rehefa nanolotra ireo tahirin-kevitra ara-diplomasia teo anivon’ny Ministeran’ny Raharaham-bahiny etiopianina. Rehefa avy nanao iraka tany Roma sy Dakar ny lehilahy, dia mandray ny fitarihana ity masoivoho stratejika ity ankehitriny, ao amin’ny renivohitra ivon’ny fifandraisana amin’ny Vondrona Afrikanina sy ireo mpamatsy vola iraisam-pirenena lehibe.
Addis-Abeba, Éthiopie – 22 jona 2026
Dingana lehibe eo amin’ny fanamafisana ny fifandraisana diplomatika eo amin’i Madagasikara sy i Éthiopie. Nanolotra tamin’ny fomba ofisialy ny dika mitovy amin’ny taratasy manendry azy (remise des copies figurées) any amin’ny Ministeran’ny Raharaham-bahiny etiopianina i Auguste Paraina, Masoivohon’i Madagasikara vaovao miasa sy monina ao Addis-Abeba. Izao fomba fanao ara-diplomasia izao dia dingana tsy maintsy arahina mialoha ny hanolorana ny dika ofisialy (lettres de créance) amin’ny Lehiben’ny Fanjakana etiopianina, saingy efa mametraka sahady ny Masoivoho vaovao amin’ny andraikitra feno hitantana ny masoivoho malagasy.
Tsy mionona amin’ny fifandraisana dabilatera eo amin’ny tany roa tonta fotsiny ny andraikitry ny Masoivoho malagasy any Éthiopie fa manana lanjany lehibe eo amin’ny sehatry ny diplomasia afrikanina. Toera-manan-tantara sy stratejika i Addis-Abeba satria ao no misy ny foiben’ny Vondrona Afrikanina (UA) sy ny Komisionan’ny Firenena Mikambana ho an’ny Afrika (CEA). Ao anatin’ity ivon-toerana iraisam-pirenena lehibe ity ihany koa no ifampiraharahana ny fiarahana miasa amin’ireo mpamatsy vola vaventy, toy ireo rafitra nateraky ny fifanarahan’i Bretton Woods sy ny Vondrona Eoropeana, izay manana solontena ambony ao an-toerana handrindra ny fandaharan’asany manerana ny kaontinanta.
Anisan’ny laharam-pahamehana amin’izao iraka vaovao izao ny fampiroboroboana ny diplomasia ara-toekarena, mikendry ny hampahafantarana ny herin’ny Nosy sy ny fisarihana mpampiasa vola vaovao. Mba hanatanterahana izany andraikitra mavesatra izany, dia afaka miantehitra amin’ny traikefa matanjaka eo amin’ny sehatra iraisam-pirenena ity mpitondra teny ity. Efa nitantana masoivoho ambony mantsy i Auguste Paraina talohan’izao, tamin’ny naha Masoivohon’i Madagasikara azy tany Roma sy tany Dakar.
Noho izany traikefa ara-politika sy ara-diplomasia manankarena izany, ny Masoivoho vaovao dia vonona hitondra hery vao ho an’ny fifandraisan’Antananarivo sy Addis-Abeba, sady hifanakaiky hatrany amin’ireo mpiray tanindrazana monina na mandalo any amin’izany faritra izany.
Laisser un commentaire