Taorian’ireo hetsika fanaraha-maso sy fisavana nifanesy teto Antananarivo, nitohy tany amin’ny faritany indray ny ezaka fampanarahana ny lalàna ataon’ny Fitaleavam-paritry ny Varotra sy ny Fanjifana (DRCC). Nandraisana fepetra hentitra avy hatrany ireo toeram-pivarotana lehibe (Grandes surfaces) tratra nanao fandikan-dalàna nandritra ny fisafoana natao ny 10 ka hatramin’ny 12 Jona 2026 lasa teo, ho fiarovana ny fahasalamana sy ny tamberin’andraikitra amin’ny mpanjifa.
Antananarivo – 12 jiona 2026
Atsimo Andrefana: Entana lany daty maro no nogiazana tany Toliara
Ny 10 sy 11 Jona 2026, nidina ifotony nanao fitsirihana tany amin’ireo toeram-pivarotana lehibe ao Toliara ny mpanaramaso ny tsena ao amin’ny DRCC Atsimo Andrefana, niaraka tamin’ireo manampahefana any an-toerana. Tsy nisy navela ho dila fa nosavaina avokoa na ny faritra fampirantiana ny entana, na ny laboratoara fikirakirana ny hena, eny hatramin’ny toerana hitehirizana ny hena voahodina sy ireo vokatra vaovao isan-karazany.
Nandritra ity hetsika ity no nahatratrarana entana efa lany daty mbola namidy teny amin’ny talantalana. Isan’izany ny mofomamy anaty fonosana, flan, vary aromatika ary voamadinika isan-karazany. Noesorina teo no ho eo ireto entana loza ho an’ny fahasalamana ireto ary nampidirina avy hatrany amin’ny fombafomba ara-panjakana fanao amin’ny tranga fandikan-dalàna sy fampiharana sazy ireo tompon’andraikitra amin’izany.
Atsinanana: Nodinihina manokana ny fampangatsiahana tao Toamasina
Ho an’ny Faritra Atsinanana indray, ny 11 sy 12 Jona 2026 no n家atontosana ny fisafoana. Voatetin’ny mpanaramaso avy amin’ny DRCC avokoa ireo toeram-pivarotana lehibe mampisongadina ny tanànan’i Toamasina toy ny Super U, Score, Leader Price, Supermaki ary Kibo.
Nifantoka betsaka tamin’ny resaka fenitra teknika momba ny fampangatsiahana ny entana ny fanadihadiana tamin’ity indray mitoraka ity. Nangatahan’ireo mpanaramaso fanazavana sy porofo ireo tompon’andraikitra ny amin’ny fepetra raisina raha sanatria misy ny fahatapahan’ny herinaratra, mba tsy ho simba ireo entana mila hatsiaka. Ho an’ny tao Toamasina manokana dia hita taratra fa milamina ny toe-javatra amin’ny ankapobeny satria tsy nahitana entana lany daty teny amin’ireo mpivarotra lehibe ireo.
Boeny: Nahatratra ny fenitra tany Mahajanga
Tsy nitodika tany aoriana koa ny tao amin’ny Faritra Boeny ny 11 Jona. Voahaja tanteraka ny tahan’ny hatsiaka hitehirizana ireo entana sy vokatra fihinana tao amin’ireo toeram-pivarotana lehibe telo ao Mahajanga nandritra ny fizotran’ny fanaraha-maso.
Ankoatra izay, nitararina tany amin’ireo tsena kely eny anivon’ny tobim-pitsinjarana solika sivy koa ny fitsirihana nataon’ny mpanaramaso avy amin’ny DRCC Boeny. Nivalona tam-pilaminana ny hetsika satria tsy nahitana entana lany daty nampiahiahy mihitsy tany an-toerana. Manantitrantitra ny Ministera mpiahy amin’ny alalan’ny DRCC fa hitohy manerana ny Nosy izao hetsika tsy ampoizina izao mba ho fiantohana ny kalitaon’ny entana jifain’ny vahoaka isan’andro.
Laisser un commentaire