Nankatoavin’ny Filankevitry ny Minisitra tamin’ny 2 jona 2026 lasa teo ny fanatanterahana tetikasa fampirantiana momba ny fampiasana ny grès bitumineux any Bemolanga amin’ny asa fikojakojana lalana ao Morafenobe. Ity tetikasa goavana vatsian’ny Fonds Routier vola ity dia dingana lehibe hitrandrahana mivantana ny harena voalohany hany teto an-toerana ho fampandrosoana ny fotodrafitrasa malagasy.
Antananarivo – 9 jiona 2026
Dingana mivaingana amin’ny fampiasana ny harena an-kibon’ny tany ho an’ny tombontsoan’ny besinimaro. Hiarahan’ny OMNIS, ny Laboratoire National des Travaux Publics et du Bâtiment (LNTPB) ary ny Ministeran’ny Asa Vaventy manatanteraka ity tetikasa fampisehoana ity. Ny tanjona voalohany dia ny hampiseho amin’ny fomba mibaribary ny fahombiazan’ny fampiasana ity harena ity eto an-toerana, indrindra eo amin’ny lafiny ara-teknika sy ny fitsitsiana ara-toekarena raha ampitahaina amin’ny fitaovana hafarana avy any ivelany.
Amin’ny maha tompon’andraikitra mpanatanteraka azy, ny OMNIS no hiandraikitra ny fakana, ny fanomanana ary ny fanomezana grès bitumineux milanja 300 taonina hoenti-manatanteraka ity asa fanandramana ity ao Morafenobe. Io vaingana io no hapetraka amin’ny lalana mba hitsarana ny tanjany sy ny faharetany manoloana ny herin’ny natiora sy ny fifamoivoizana.
Tombanana ho 2,85 miliara barila ny tahirin’ny grès bitumineux ao Bemolanga ankehitriny. Io tarehimarika goavana io no manamarina ny maha-harena stratejika tsy azo tsinontsinoavina azy ho an’i Madagasikara, izay afaka manova tanteraka ny tantaran’ny fanamboaran-dalana eto amin’ny Nosy sy manome fahaleovantena ara-toekarena eo amin’ny fotodrafitrasa
Laisser un commentaire