Antananarivo, 2 jiona 2026
Namoaka fanambarana hentitra ny Fitsarana Avo momba ny Lalampanorenana (HCC) manoloana ny savorovoron-kevitra misy ankehitriny sy ny fanambaran’ny Minisitry ny Fitsarana mikasika ny fikasana hanenjika ara-pitsarana ny iray amin’ireo mpikambana ao aminy. Nampahatsiahy ny andininy faha-108 ao amin’ny Lalampanorenana ny HCC ary nanamarika fa fanitsakitsahana goavana ny fisaraham-pahefana sy ny fahaleovantenan’ny asam-pitsarana izao fihetsiky ny mpanatanteraka izao.
Fiarovana ny tsiambaratelon’ny fifampidinika ara-pitsarana
Nijoro nampahatsiahy ny lalàna manan-kery ny Fitsarana Avo momba ny Lalampanorenana mba hiarovana ny hasin’ny asam-pitsarana eto Madagasikara. Araka ny andininy faha-108 ao amin’ny Lalampanorenana, manana fahaleovantena tanteraka ny mpitsara mpamoaka didy, ny mpitsara ary ny mpitsara mpanampy amin’ny asa sahaniny. Ny Lalampanorenana sy ny lalàna ihany no mifehy azy ireo, ka tsy azo tohintohinina na amin’ny fomba inona na amin’ny fomba inona izy ireo amin’ny fanatanterahana ny andraikitra nankinina aminy.
Notsindrian’ny HCC manokana ny fitsipika mifehy ny tsiambaratelon’ny fifampidinika na ny « délibération ». Alohan’ny hamoahana didy na hevitra dia mivory am-bavahady mihidy ny mpikambana rehetra. Malalaka tanteraka ny tsirairay maneho ny heviny sy ny rhesany momba ny fandraisana ny fitoriana na ny votoatiny, ary tsy misy olona na manam-pahefana ivelany afaka mitsabaka na mahafantatra ny antsipirian’izany adihevitra izany. Ity fiarovana ara-dalàna ity, izay mihatra amin’ny rafi-pitsarana rehetra, dia mandrara tanteraka ny fanenjehana na ny fandrahonana ara-pitsarana ny mpitsara noho ny hevitra nasehony tamin’izany fotoana izany.
Fandikan-dalàna goavana sy firatana amin’ny Lalampanorenana
Nivantana ny fanambaran’ny HCC manoloana ny tenin’ny Minisitry ny Fitsarana izay naneho finiavana hanenjika mpanolotsaina avo amin’ny asany. Nambaran’ny HCC fa izany fihetsika izany dia fihantsiana sy fanamavoana ny Lalampanorenana ary fanitsakitsahana ny fisaraham-pahefana izay fenitra tsy maintsy hajaina ao anatin’ny tany tan-dalàna. Andrim-panjakana mahaleotena tanteraka ny Fitsarana Avo araka ny andininy faha-40, ka izany fihetsika izany dia miteraka fahavoazana ho an’ny rafitra repoblikana.
Mba hialana amin’ny fifangaroan-kevitra, nanazava ny HCC fa afaka enjehina ara-pitsarana tsara ny mpikambana ao aminy araka ny andininy faha-133 sy 134 ao amin’ny Lalampanorenana raha nanao heloka tsotra na heloka bevava. Saingy izany fanenjehana izany dia tsy maintsy mihatra amin’ny zavatra nataony ivelan’ny asany ihany. Tsy azo atao mihitsy ny manenjika ny mpitsara noho ny fanehoan-keviny mandritra ny fandinihana ny raharaha nampidirina teo anivon’ny Fitsarana Avo, na inona na inona anton’izany fitoriana izany.
Laisser un commentaire