SOLIKA MAVESATRY TSIMIRORO: KALITAO AMBONY, MIAVAKA ERAN-TANY

Antananarivo, 30 mey 2028

Ny solika mavesatry Tsimiroro: Harena ara-angovo manana kalitao ambony sy miavaka eran-tany

Misy hery lehibe miafina eo amin’ny sehatry ny angovo eto Madagasikara, ary ny solika mavesatra avy ao Tsimiroro no porofo mivaingana amin’izany. Ny tena mampiavaka ity solika malagasy ity amin’ny tsena iraisam-pirenena dia ny tahan’ny solifara ambany dia ambany ao anatiny. Raha fantatra amin’ny fananana loto sy solifara betsaka ny solika mavesatra amin’ny ankapobeny, ny ao Tsimiroro kosa dia tsy manaraka izany fironana izany fa sokajiana ho vokatra tsara kalitao sy madio tanteraka.

Ny antontan’isa dia mampiseho fahadiovana tsy fahita firy. Raha ampitahaina amin’ny solika mavesatra mahazatra, ny avy ao Tsimiroro dia ahitana tahana solifara latsaka in-telo na in-efatra mihitsy. Ary mbola mampitolagaga kokoa ny fampitahana azy amin’ireo firenena goavana mpamokatra solika eran-tany, satria latsaka hatramin’ny in-roapolo avo heny ny solifara ao aminy raha oharina amin’ny solika mavesatra any Alberta any Kanada na ny any amin’ny faritr’i Orénoque any Venezoela.

Io fahadiovana manokana io dia mitondra tombony mivaingana sy avo lenta eo amin’ny fampiasana azy, manomboka amin’ny fahombygana ara-angovo. Rehefa dorana hamitana herinaratra ny solika avy ao Tsimiroro, ny fatra iray mitovy amin’ny solika hafa dia mamokatra herinaratra betsaka kokoa, satria vitsy ny loto manakantsakana ny fiasany.

Ankoatra ny fahombiazana ara-teknika, hita taratra eo amin’ny fotodrafitrasa famitana angovo ihany koa ny tombontsoa. Ny fampiasana solika kely solifara dia miaro ny milina tsy ho harafesina sy tsy ho simba haingana. Izany no mahatonga ny fitaovana haharitra ela kokoa ary mampihena ny fandaniana amin’ny fikojakojana sy fanamboarana ny milina mpamokatra herinaratra.

Farany, mifamatotra tanteraka amin’ny fiarovana ny tontolo iainana ity tombony ara-teknika ity, indrindra amin’izao vanim-potoana itadiavana angovo madio izao. Noho ny havitsian’ny solifara ao aminy, dia kely dia kely ihany koa ny entona simika (SOx) mivoaka rehefa dorana izy. Mampihena fatratra ny loto eny amin’ny rivotra izany raha oharina amin’ireo solika mavesatra fampiasa manerantany, ka mahatonga an’i Tsimiroro ho loharano ara-angovo miaro ny tontolo iainana sy ny hoavin’ny firenena