Antananarivo, 27 Mey 2026
Ao anatin’ny hetsika fampahafantarana sy fampitandremana efa nataony, nampiakatra rira ny fanaraha-maso eny ifotony ny Kaominina Ambonivohitry ny Antananarivo (CUA) mba hamerenana ny filaminana eto an-drenivohitra. Nidina tamina hetsika iraisana ny Talen’ny Fitaterana sy ny Rindran-damina an-tanàn-dehibe (DTMU), ny Polisy monisipaly, ny Polisy nasionaly, ary ny Société Municipale de Gestion Digitale (SMGD), teo ambany fitarihan’ny Filoha lefitra faharoan’ny Delegasiona manokan’ny tanànan’i Antananarivo.
Nandritra izany asa izany, nisy ny fampidirana fourrière ireo fiara nijanona tamin’ny toerana tsy nahazoana lalana. Niantefa tamin’ireo faritra efa fantatra sy nahazoana fitarainana ny fidirana an-tsehatra, indrindra fa tany Ambohitrakely, Manjakaray, ary Anjanahary, izay efa nahazo fampitandremana mialoha ireo mpamily.
Ny tanjona lehibe amin’izao hetsika izao dia ny hamerenana ny fandriampahalemana sy ny fampandehanana ara-dalàna ny fifamoivoizana, ny hanadiovana sy hanatsarana ny endriky ny tanàn-dehibe, ny hanamaisana ny fifindran-toeran’ny mponina isan’andro, ary indrindra ny hampanajàna ny sehatra ho an’ny besinimaro sy ny lalàna manan-kery.
Mampatsiahy ny CUA fa izao hetsika izao dia tafiditra ao anatin’ny asa fanaraha-maso sy fidirana an-tsehatra mitohy mba hiantohana tanàna madio kokoa, azo antoka kokoa, ary mendrika ho an’ny mponina rehetra. Nambaran’ny manam-pahefana fa mbola hitohy tsy tapaka ny fanaraha-maso sy ny fanesorana ireo fiara mandika lalàna tahaka izao. Ho an’izay rehetra mila fanazavana fanampiny momba ny famerenana ny fiara na ny fomba fiasa ara-panjakana, manasa ny mpampiasa lalana ny tomponandraikitra mba hifandray mivantana amin’ny sampandraharahan’ny Kaominina Ambonivohitry ny Antananarivo.
Laisser un commentaire